Belarus Teleqraf Agentliyi (BELTA) bu ölkənin dövlət başçısı Aleksandr Lukaşenkonun mətbuat xidmətinə istinadla bildirmişdir ki, 2019-cu ildə Belarusda keçiriləcək Avropa Oyunlarına hazırlıq üzrə Təşkilat Komitəsi yaradılmışdır. Belarus Prezidenti yanvarın 9-da bu barədə fərman imzalamışdır.

Respublika Təşkilat Komitəsinə Belarusun Baş naziri başçılıq edir. Təşkilat Komitəsinin tərkibinə bu genişmiqyaslı tədbirə hazırlıq və onun keçirilməsində bilavasitə iştirak edəcək dövlət orqan və təşkilatlarının rəhbərləri daxil edilmişlər.

Təşkilat Komitəsinə II Avropa Oyunlarına hazırlıq işləri ilə məşğul olacaq bütün təşkilatların sıx fəaliyyətinin əlaqələndirilməsi funksiyaları həvalə olunmuş, habelə üç ay müddətində müvafiq tədbirlər planının təsdiqi nəzərdə tutulmuşdur.

Oqtay BAYRAMOV,
“Xalq qəzeti”