Sankt-Peterburqda 17 yaşlı futbolçulardan ibarət 16 yığma komanda arasında FİFA-nın birinci vitse-prezidenti olmuş Valentin Qranatkinin xatirəsinə həsr edilən ənənəvi beynəlxalq turnirin  ikinci oyun günü mübarizəyə qoşulan Azərbaycan kollektivi Litva yığmasına 1:2 hesabı ilə  uduzsa da, ilkin mərhələ yarışlarının finişinə “C” qrupunda ilk iki yerdən birində çatıb, dörddəbir finala vəsiqə qazanmaq imkanını hələ itirməyib.

Qarşıda duran məqsədə nail olmaq üçün futbolçularımız bu gün Qazaxıstan və yanvarın 13-də Slovakiya komandalarına qarşı keçirəcəkləri növbəti iki görüşdə maksimum miqdarda xal toplamağa çalışmalıdırlar.

Birinci turda Slovakiya-Qazaxıstan görüşündə hesab açılmamış (0:0) və qrupun ilk lideri Litva komandası olmuşdur.

Turnirin ikinci günü “D” qrupunda da tamaşaçılar iki oyunun gedişini izləmişlər. Moldova və Sloveniya futbolçuları meydandan heç-heçə ilə ayrılmışlar-0:0, Sankt-Peterburq komandası isə İran yığması üzərində 2:1 hesabı ilə qələbə qazanmışdır.

Dünən  “A” və “B” qruplarında dörd görüşlə ikinci tura start verilmişdir.

Oqtay BAYRAMOV,
“Xalq qəzeti”