Bu gün Bakı İdman Sarayında böyüklər arasında sərbəst və yunan-Roma güləşi üzrə növbəti Azərbaycan çempionatına start veriləcəkdir. Yeni ildə güləş ustalarımız üçün ilk ciddi sınaq olacaq bu yarış Azərbaycan Gənclər və İdman Nazirliyi və Milli Güləş Federasiyasının birgə təşkilatçılığı ilə keçirilir.

Federasiya saytının bu barədə yaydığı xəbərdə, həmçinin bildirilir ki, çempionatda öz çəki dərəcələrində ilk üç yeri tutan güləşçilər Azərbaycan yığma komandası heyətinə cəlb ediləcək və onun tərkibində il ərzində keçiriləcək beynəlxalq yarışlarda ölkəmizi təmsil etmək hüququ qazanacaqlar.

Bu arada Dünya Güləş Birliyi 2016-cı ilin yekunlarına əsasən, yunan-Roma güləşi üzrə 2017-ci ilin ilk reytinq cədvəlini dərc etdirmişdir. Siyahıda Azərbaycanın doqquz güləşçisinin də adı var. Onlardan yeddisi birinci onluğa daxildir.

Rio-de-Janeyro Olimpiadası-2016-nın bürünc mükafatçıları Rəsul Çunayev (66 kq) 3-cü, Sabah Şəriəti (130 kq) 4-cü yerdədirlər. Dünya çempionatının bürünc medalının sahibi Həsən Əliyev (71 kq) 3-cü mövqedədir.  Rövşən Bayramov (59 kq) 6-cı, Rafiq Hüseynov (80 kq) 7-ci, Elvin Mürsəliyev (75 kq)  və İslam Abbasov
(85 kq) 8-cidirlər.

Oqtay BAYRAMOV,
“Xalq qəzeti”