Çempionlar Liqasında ikinci tur starta hazırlaşır

İlk günlərini yaşadığımız 2017-ci ildə Azərbaycan idmançılarından qadınlardan ibarət voleybol klublarımız rəsmi beynəlxalq meydanda çıxışlarına birincilər sırasında başlayacaqlar.

Artıq yanvarın 10-da “Telekom” komandası Çempionlar Liqası turnirinin qrup mərhələsinin ikinci turu çərçivəsində Bakıda “Çemik Polis”i (Polşa) qəbul edəcəkdir. Avropa Voleybol Konfederasiyası bu oyunda hakimliyi Lixtenşteyn və  Rumıniya voleybol federasiyalarının nümayəndələrinə həvalə etmişdir.

Ertəsi gün, yanvarın 11-də isə “Azərreyl” İstanbulda “Fənərbaxça”nın qonağı olacaq. Bu rəqiblərin hər ikisi turnirə qələbə ilə başlamışdır və onların maraqla gözlənilən görüşünün qalibi qrupun vahid lideri olacaq. Oyunu bolqarıstanlı və italiyalı hakimlər idarə edəcəklər.

Çempionlar Liqasındakı təmsilçilərimizin Azərbaycan Superliqasında  uğurla çıxış etdiklərini də xatırladaq. Yeddi turdan sonra turnir cədvəlinə 18 xala malik “Telekom”  başçılıq edir, onun ən yaxın izləyicisi “Azərreyl” isə 16 xal toplamışdır.

Azərbaycan şahmatçıları  Bazel və Brisbendə

Ölkəmizin şahmat məktəbinin bir neçə yetirməsi bu günlər vətəndən uzaqlarda beynəlxalq turnirlərin mükafatları uğrunda mübarizə aparır.

İsveçrənin Bazel şəhərində təşkil olunmuş beynəlxalq festivalın “A” turnirində yarışan Eltac Səfərli ilk dörd turda üç qələbə və bir heç-heçə sayəsində 3,5 xal toplayaraq liderlər qrupunda irəliləyir. Onun həmvətəni Nicat Abasov isə dörd görüşdə 3 xal qazanmışdır. İsveçrə sistemi üzrə keçirilib doqquz turdan ibarət olan yarışda 127 rəqib, o cümlədən 15 qrossmeyster mübarizə aparır. 

Daha bir şahmatçımız Kənan İzzət isə Avstraliyanın Brisben şəhərinin qonağıdır. Təmsilçimiz dörd turdan sonra 3 xalla liderlərin izləyiciləri qrupundadır.

Oqtay BAYRAMOV,
“Xalq qəzeti”