Dünya reytinq cədvəlinə Azərbaycan boksçusu başçılıq edir

Beynəlxalq Həvəskar  Boks Assosiasiyası (AİBA) kişi və qadın rinq ustalarının növbəti reytinq cədvəlini dərc etdirmişdir.

Təmsilçilərimiz arasında ən yaxşı göstəriciyə dünya çempionu Elvin Məmişzadə malikdir. O, 52 kq çəki dərəcəsində dünya reytinq cədvəlinə başçılıq edir.

Azərbaycan milli komandasının digər üzvlərindən Albert Səlimov (60 kq),  Rio-de-Janeyroda XXXI Yay Olimpiya Oyunlarının gümüş mükafatçısı Lorenso Sotomayor (64 kq), Pərviz Bağırov (69 kq), Teymur Məmmədov (81 kq) və Abdulqadir Abdullayev (91 kq) öz çəki dərəcələrində üçüncü yeri tuturlar. Tayfur  Əliyev (56 kq) onuncu, Rio-2016-nın bürünc medalının sahibi Kamran Şahsuvarlı (75 kq) on birincidir.

Qadın boksçularımızdan isə Yana Alekseyevna (60 kq) dördüncü, Yelena Vıstropova (69 kq) altıncı, Anna Əlimərdanova (54 kq) onuncu yerdədirlər.

Çempionlar Liqası: fevraladək fasilə

UEFA Çempionlar Liqası yarışlarında qrup mərhələsi görüşlərinə yekun vurulmuş və Avropanın ən mötəbər klub turnirində mübarizəni davam etdirəcək 16 komanda məlum olmuşdur.

Bunlar qrupların qalibləri İngiltərənin “Arsenal”, “Lester”, İspaniyanın “Atletiko”, “Barselona”, İtaliyanın “Napoli”, “Yuventus”, Almaniyanın “Borussiya” (Dortmund), Fransanın “Monako” komandaları,  qruplarda ikinci yeri tutmuş Almaniyanın “Bayer”, “Bavariya”, İspaniyanın “Real”, “Sevilya”, Portuqaliyanın “Benfika”, “Portu”, İngiltərənin “Mançester Siti” və Fransanın “Pari-Sen-Jermen” klublarıdır.

Səkkizdəbir finalın püşkü dekabrın 12-də İsveçrənin Nyön şəhərində atılacaq. Bu mərhələnin ilk oyunları 2017-ci ilin fevral ayında, cavab görüşləri isə martda keçiriləcəkdir.

Oqtay BAYRAMOV,
 “Xalq qəzeti”