Azərbaycan məktəbliləri “Jemçujina”da

Soçinin “Jemçujina” otelində keçirilən 7-17 yaşlı məktəblilər arasında şahmat üzrə dünya birinciliyində
27 ölkənin 500-dən çox təmsilçisi iştirak edir. Yarış sahibləri rusiyalı məktəblilərlə yanaşı, Azərbaycan da çempionatda geniş heyətlə təmsil olunur.

Artıq üç turun görüşləri arxada qalmışdır. Həmvətənlərimizdən üç nəfəri start turlarını itkisiz başa vurmuşdur. Səmra Qasımova 9 yaşlı qızların turnirində, Xəzər Babazadə və Murad İbrahimli isə müvafiq surətdə 11 və 15 yaşlı oğlanların yarışlarında 3 xal toplayaraq maksimum nəticə göstərmişlər. Yusif Abbasov da 9 yaşlı oğlanların turnirinə yaxşı başlayaraq üç görüşdə iki qələbə və bir heç-heçə sayəsində 2,5 xal qazanmışdır.

Dekabrın 9-da finişə çatacaq dünya çempionatı İsveçrə sistemi üzrə keçirilir və doqquz turdan ibarətdir.

Olimpiya mükafatçılarımız dünya reytinqində liderdirlər

Rio-de-Janeyroda XXXI Yay Olimpiya Oyunlarının gümüş mükafatçıları olmuş azərbaycanlı tatami ustaları Rüstəm Orucov (73 kq) və Elmar Qasımov (100 kq) Beynəlxalq Cüdo Federasiyasının bu günlərdə dərc etdirdiyi reytinq cədvəlində lider mövqeyindədirlər. Onlar əvvəlkitək öz çəki dərəcələrində siyahıya başçılıq edirlər.

Milli komandamızın daha iki üzvü birinci onluğa daxildir. Orxan Səfərov (60 kq) siyahıda ikinci, Elxan Məmmədov (100 kq) yeddinci pillələrdə irəliləyirlər. Nicat Şıxəlizadə (66 kq) isə on ikincidir.

Xorvatiyalı İvan Bebek

UEFA Avropa Liqası turnirinin qrup mərhələsinin sonuncu, altıncı turunda Azərbaycanın “Qarabağ” və İtaliyanın “Fiorentina” komandalarının görüşünü Xorvatiya Futbol Federasiyasının nümayəndələri idarə edəcəklər. Baş hakim rolunda İvan Bebek çıxış edəcək.

Pley-off mərhələsinə aparan yolda hər iki rəqib üçün son dərəcə mühüm əhəmiyyətə malik “Qarabağ”—“Fiorentina” matçı dekabrın 8-də Tofiq Bəhramov adına Respublika stadionunda oynanılacaq və saat 20:00-da başlanacaq.

Avroliqadakı digər təmsilçimiz “Qəbələ” isə elə həmin axşam Almaniyada “Maynts”ın qonağı olacaq. UEFA bu görüşdə hakimliyi Simon Li Evansın başçılığı ilə uelsli hakimlər briqadasına həvalə etmişdir. Oyunda topa ilk zərbə Bakı vaxtı ilə saat 22:00-da endiriləcək.

Oqtay BAYRAMOV,
 “Xalq qəzeti”