Litvanın paytaxtı Vilnüsdə 18-22 yaşlılar arasında kyokuşin karate üzrə ikinci Avropa çempionatı keçirilmişdir.
Azərbaycan Kyokuşin Karate Federasiyasından AzərTAc-a bildirmişlər ki, 18 ölkədən 212 idmançının yarışdığı çempionatda kyokuşin karate üzrə yığma komandamız uğurla çıxış etmişdir.
Çempionatda 75 kiloqram çəki dərəcəsində mübarizə aparan Nail Quliyev keçirdiyi bütün görüşlərdə rəqiblərini məğlub edərək fəxri kürsünün ən yüksək pilləsinə qalxmışdır.
Digər idmançımız-Valeh Cəfərov (65 kq) yarışda ağır beyin travması almasına baxmayaraq, 3 döyüşünü müvəffəqiyyətlə başa vurmuş, lakin finalda xal hesabı ilə uduzaraq turnirin gümüş medalına sahib olmuşdur.
Ümumi komanda hesabında Azərbaycan yığması Avropada birinci olmuşdur.
Kyokuşin karatenin banisi Masutatsu Oyamadır. Əksər dövlətlərin güc strukturları hərbi döyüş növü kimi məhz karatenin bu növündən istifadə edirlər. 1996-cı ildə ölkəmizdə kyokuşin karate növü üzrə ilk klub rəsmi olaraq fəaliyyətə başlamış, iki il sonra isə Azərbaycan Kyokuşin Karate Federasiyası Ədliyyə Nazirliyində qeydiyyatdan keçmişdir. Azərbaycan Kyokuşin Karate Federasiyasının prezidenti, beşinci dan şıxan Allahverdi Rüstəmovun başçılığı altında hazırda ölkəmizin əksər şəhər və rayonlarında 3 minə yaxın idmançı karatenin bu növü ilə məşğul olur.

{nl}