Norveçli dünya çempionu Maqnus Karlsen ilə iddiaçıların turnirinin qalibi rusiyalı Sergey Karyakin arasında Nyu-Yorkda davam edən dünya şahmat tacı uğrunda matçda nəhayət, ilk qələbə qazanılmışdır.

Ardıcıl yeddi heç-heçədən sonra səkkizinci görüşdə  rusiyalı qrossmeyster qara fiqurlarla 53-cü gedişdə dünya çempionunu məğlubiyyətlə barışmağa məcbur etmiş və  hesabda irəli çıxmışdır – 4,5:3,5.

Dünən matçda istirahət günü idi. Bu gün rəqiblər doqquzuncu görüşdə mübarizə aparacaqlar. Ağlarla Karyakin oynayacaq.

Yarışın reqlamentinə görə on iki görüş keçirilməlidir. Əgər hesab 6:6 olarsa, dünya çempionunu noyabrın 30-da tay-breyklər müəyyənləşdirəcək.

O. BAYRAMOV,
“Xalq qəzeti”