“Qarabağ”–“Kəpəz”–1:0, “Qəbələ”–“Zirə”–1:0, “Sumqayıt”–“Neftçi”–2:0, “İnter”–AZAL–3:0. Bu nəticələrdən göründüyü kimi, Topaz premyer liqasının 12-ci turunda qollara, qələbə və xallara sevinən tərəf yalnız “doğma divarlar” arasında oynayan komandalar olmuşlar. Qonaqların üst-üstə dörd görüşdə xal qazana bilməmələri qalsın bir yana, onlar heç bir top belə vura bilməmişlər. Deməli, idmanda, xüsusən də futbolda meydan sahibi amili az əhəmiyyət kəsb etmir.

Bu turdan sonra turnir cədvəlinin ən yüksək pillələrində elə bir ciddi dəyişiklik baş verməmişdir. Qoşa liderlər “Qəbələ” və “Qarabağ” (hər ikisinin 28 xalı var) arasındakı məsafə dəyişməmiş, onların ən yaxın izləyicisi və ötən turun ən məhsuldar komandası “İnter” (23 xal) isə üçüncü pillədə öz mövqeyini bir qədər də möhkəmləndirmişdir. Hazırda 14 xalla dördüncü yeri tutan “Zirə”nin “İnter”dən 9 xal geri qaldığını nəzərə alsaq, bugünkü liderlər üçlüyünə çatmaq çətin olacaq.

Noyabrın 27-29-na təyin edilmiş 13-cü turda azarkeşlər “Kəpəz”–“Neftçi”, AZAL–“Sumqayıt”, “Zirə”–“İnter”, “Qarabağ”–“Qəbələ” görüşlərini izləmək imkanı qazanacaqlar. Bu turda liderlərin mübarizəsi diqqət mərkəzində olacaq. Rəqiblərdən hər hansı birinin qələbəsi onu turnir cədvəlində vahid lider edəcək.

Hələlik isə futbol ictimaiyyətimizin diqqəti yenidən UEFA Avropa Liqası turnirinə yönələcək. Avroliqanın qrup mərhələsinin beşinci turu starta çıxır. Noyabrın 24-də “Qarabağ” Çexiyada “Slovan”a qarşı çox mühüm görüş keçirəcək, “Qəbələ” isə “Anderlext”i (Belçika) qəbul edəcək.

Oqtay BAYRAMOV,
“Xalq qəzeti”