Deyəsən, daş qayaya rast gəlib

Dünya çempionu Maqnus Karlsenlə (Norveç) iddiaçıların turnirinin qalibi Sergey Karyakin ( Rusiya) arasında Nyu-Yorkda keçirilən dünya şahmat tacı uğrunda matçda, deyəsən, daş qayaya rast gəlib. On iki oyundan ibarət matçın altı görüşü artıq arxada qalsa da, hələ rəqiblərdən heç biri digərinə öz üstünlüyünü sübuta yetirə bilməyib.

Ağlarla Karyakinin oynadığı altıncı görüşdə qrossmeysterlər 32 gedişdən sonra heç-heçəyə razılaşıblar. Yarışın birinci yarısından sonra hesab 3:3-dür. Dünən matçda istirahət günü idi. Bu gün yeddinci görüş keçiriləcək. Reqlamentə görə, ağlarla yenə rusiyalı qrossmeyster oynayacaq.

Əgər matçın qarşıdakı altı görüşündə də rəqiblər yalnız heç-heçələrlə kifayətlənsələr və finişdə hesab 6:6 olsa, yarışın qalibini və dünya şahmat tacının sahibini tay-breklər müəyyənləşdirəcək. Qısa görüşlər noyabrın
30-na nəzərdə tutulub.

Zaqreb “Araz”ı gözləyir

Xorvatiya paytaxtında futzal üzrə UEFA kuboku yarışlarının elit mərhələsi artıq start ərəfəsindədir. Zaqrebdə Azərbaycanın “Araz” komandasının rəqibləri meydan sahiblərinin “Nasional”, Almaniyanın “Hamburq” və Rusiyanın “Yuqra” klubları olacaq. Elit mərhələnin ikinci qrupunda çıxış edən bu komandalardan ən yaxşısı gələn ilin aprel ayında keçiriləcək “Dördlər finalı”na vəsiqə qazanacaq.

Cəmisi isə elit mərhələdə 16 komanda yarışacaq. Onlar dörd qrupa bölünmüşlər. Qrupların qalibləri həlledici görüşlərdə oynamaq hüququ qazanacaqlar.

“Araz” Zaqreb turnirinə noyabrın 23-də “Nasional”a qarşı görüşlə başlayacaq, ertəsi gün Rusiya təmsilçisi ilə “münasibətləri aydınlaşdıracaq”, noyabrın 26-da isə “Hamburq”la oynayacaq.

Şübhəsiz, bu rəqiblərin hər biri indi yalnız birinci yer haqqında düşünür. Onlardan kimin arzusunun həyata keçəcəyini turnirin sonuncu günü biləcəyik.

Oqtay BAYRAMOV,
 “Xalq qəzeti”