Superliqada “Telekom” liderdir

Qadın voleybol komandaları arasında Azərbaycan Superliqasında üç turun oyunları arxada qalmışdır. Üçüncü turda “Telekom” voleybolçuları “Lokomotiv”lə oyunun taleyini üç hissədə öz xeyirlərinə həll etmişlər. Gərgin mübarizə şəraitində davam edən digər görüşdə isə “Azərreyl” komandası “Azəryol” üzərində çətin qələbə qazanmışdır – 3:2.

Üç turdan sonra turnir cədvəlinə “Telekom” başçılıq edir. Liderin hesabında 8 xal var. İkinci-üçüncü yerləri tutan “Azərreyl” və “Azəryol” müvafiq surətdə 6 və 4 xal toplamışlar.

Veteran cüdoçular ABŞ-da görüşürlər

Bu gün Amerika Birləşmiş Ştatlarının Mayami şəhərində veteranlar arasında cüdo üzrə dünya çempionatına start veriləcəkdir. Üç gün davam edəcək yarışda 55 ölkədən ötən illərin 1000 nəfərə yaxın tatami ustası mübarizə aparacaq.

Azərbaycan Cüdo Federasiyası saytının bu barədə yaydığı xəbərdə bildirilir ki, turnir iştirakçıları arasında ölkəmizin təmsilçiləri də olacaq.

Medallara 500-ə qədər iddiaçı

Dekabrın ortalarında Estoniyanın paytaxtı Tallinndə keçiriləcək blits və rapid üzrə Avropa çempionatının medalları uğrunda 500-ə qədər şahmatçı mübarizə aparacaq. Qitə birinciliyində Azərbaycanı milli komandamızın üzvləri Teymur Rəcəbov, Rauf Məmmədov və Arkadi Naydiç təmsil edəcəklər.

Çempionat məşhur Estoniya şahmatçısı Paul Keresin anadan olmasının 100 illiyinə həsr edilən yarışlar proqramına daxildir. Reytingə görə, iştirakçıların siyahısına Rəcəbov (2788), rusiyalı Dmitri Andreykin (2743) və belaruslu Sergey Jiqalko (2728) başçılıq edirlər.  Naydiç (2672) siyahıda 19-cu, Məmmədov (2670) isə 20-ci mövqedədir.

Rəqiblər əvvəlcə dekabrın 15-16-da rapid yarışında mükafatçıları müəyyənləşdirəcək, sonra isə blits turnirində görüşəcəklər.

Oqtay BAYRAMOV,
“Xalq qəzeti”