Dünya şahmat tacı uğrunda

Nyu-Yorkda norveçli dünya çempionu Maqnus Karlsenlə iddiaçıların turnirinin qalibi rusiyalı Sergey Karyakin arasında keçirilən dünya şahmat tacı uğrunda matçda rəqiblərdən heç biri hələlik qələbələrin hesabını aça bilməmişdir. İlk dörd görüşün hamısında heç-heçə qeydə alınmış və hesab 2:2 olmuşdur.

Dünən matçda istirahət günü idi. Bu gün qrossmeysterlər beşinci görüşdə mübarizə aparacaqlar. Bu dəfə ağlarla Karlsen oynayacaq.

Matç 12 görüşdən ibarətdir. Əgər 12-ci görüşədək rəqiblərdən biri 6,5 xal toplayarsa, yarış vaxtından əvvəl  onun xeyrinə başa çatacaq. Heç-heçə təqdirində noyabrın 30-da tay-breyklər keçiriləcək.

Şimali İrlandiya Xorvatiya ilə bacarmadı

Futbol üzrə 2018-ci il dünya çempionatı seçmə yarışlarının iştirakçıları noyabrın 15-də bir neçə yoldaşlıq görüşü keçirmişlər. Bu oyunların üçündə “C” qrupunda Azərbaycan milli komandasının rəqibləri  Şimali İrlandiya, Çexiya və Almaniya komandaları meydana çıxmışlar.

Şimali İrlandiya-Xorvatiya görüşü qonaqların böyük üstünlüyü şəraitində davam  etmiş və 3:0 hesabı ilə onların xeyrinə başa çatmışdır. Çexiya futbolçuları “doğma divarlar” arasında Danimarka yığması ilə heç-heçə oynamışlar-1:1. İtaliya-Almaniya matçında isə azarkeşlər stadionu qol görmədən tərk etmişlər – 0:0.

Oqtay BAYRAMOV,
“Xalq qəzeti”