Azərbaycan cüdoçusu Avropa çempionudur

Azərbaycan cüdo məktəbinin yetirməsi Hidayət Heydərov Təl-Əvivdə (İsrail) keçirilən 23 yaşadək idmançılar arasında Avropa çempionatında əla hazırlıq nümayiş etdirərək qızıl medal sevinci yaşamışdır.

Çempionatın birinci günü mübarizəyə qoşulan tatami ustamız ilkin mərhələlərdə Kipr, Belçika, Kosovo idmançılarını, yarımfinalda rusiyalı Sayan Ondarı, finalda isə yarış sahiblərinin nümayəndəsi Toxar Butbulu məğlubiyyətə uğradaraq 73 kq çəki dərəcəsində qaliblərin mükafatlandırılması mərasimində fəxri kürsünün ən yüksək pilləsində təbrikləri qəbul etmişdir.

Həmin gün digər cüdoçularımız medal qazana bilməmişlər. Dünən isə daha dörd idmançımız tatami üzərinə çıxmışdır.

Dünya şahmat tacı uğrunda

Nyu-Yorkda (ABŞ) dünya çempionu norveçli Maqnus Karlsenlə iddiaçıların turnirinin qalibi rusiyalı Sergey Karyakin arasında dünya şahmat tacı uğrunda matça start verilmişdir. Birinci görüşdə ağlarla Karlsen oynamışdır. Rəqiblər 42-ci gedişdə heç-heçəyə razılaşmışlar.

Matç 12 görüşdən ibarətdir. Əgər qrossmeysterlərdən biri 12 görüşədək 6,5 xal toplayarsa, yarış vaxtından əvvəl onun xeyrinə başa çatacaq. Heç-heçə təqdirində tay-breklər keçiriləcək.

Dünən axşam qrossmeysterlər ikinci görüşdə mübarizə aparmışlar. Mükafat fondu 1 milyon avro olan matçın baş hakimi yunanıstanlı Tagis Nikolopulosdur.

Oqtay BAYRAMOV,
“Xalq qəzeti”