Bakının qadınlardan ibarət "Rabitə" voleybol klubu Çempionlar Liqası turnirinin ilkin mərhələsinin üçüncü turunda rəqib meydanında Polşanın "Aluprof" klubuna 2:3 hesabı ilə uduzsa da, birinci dövrəni "E" qrupunun qalibi kimi başa vurmuşdur.
Polşalılarla görüş əvvəldən axıradək gərgin mübarizə şəraitində davam etmiş və oyunun taleyi yalnız beşinci hissədə həll olunmuşdur. Həlledici anda "Aluprof" üstünlük qazanmışdır.
Bu məğlubiyyətə baxmayaraq, Azərbaycan paytaxtı voleybolçuları ikinci dövrəni qrupun lideri kimi qarşılayacaqlar. Hazırda onların 7, "Skavolini" (İtaliya) və "Aluprof"un hərəyə 5, "Dinamo"nun (Rumıniya) isə 1 xalı vardır. Turnirin ikinci yarısında "Rabitə" üç oyundan ikisini doğma şəhərdə keçirəcəkdir.