Xüsusi səsver­mənin nəticələrinə görə,  “Qarabağ” klubunun yarımmüdafiəçisi  birinci oldu.

“Qarabağ” klubunun yarımmüdafiəçisi  Dani Kintana Avropa Liqasının qrup mərhələsinin üçüncü turunun nəticələrinə görə, ən yaxşı futbolçu seçilib. UEFA-nın rəsmi saytının verdiyi xəbərə görə Kintana ümumi səslərin 69 faizini qazanıb. Dani səsvermənin nəticələrinə görə, Viktor İbarbonun (“Panaytinaykos”), Kevin Monne-Pakenin (“Sent-Etyen”), Pol Paqbanın (“Mançestr Yunayted”), Raul Ruseskunun (“Osmanlıspor”), Antonio Kandrevanın (“İnter”)  və Yevgeni Konoplyankonun (“Şalke-04”), yəni altı nəfərin bir yerdə topladığı 31 faiz səsi iki dəfədən çox üstələyib.

Xatırladaq ki, oktyabrın 20-də “Qarabağ”ın yarımmüdafiəçisi  Kintana dəqiq zərbə ilə Yunanıstanın PAOK klubunun qapıçısını məyus etmişdi. Həmin oyunda Azərbaycan qrandı Salonikidən olan komandanı 2:0 hesabı ilə məğlub etmişdi.

İ.RÜSTƏMOV,
“Xalq qəzeti”