Rusiya Şahmat Federasiyasının saytı Moskvada başa çatmış keçmiş dünya çempionu Mixail Talın xatirəsinə həsr edilən superturnirin sonuncu turunun görüşlərini şərh edərkən Şəhriyar Məmmədyarovun Vladimir Kramnik ( Rusiya )  üzərində qələbəsini xüsusi qeyd etmişdir:

“Ağlarla Vladimir Kramnikə vəzir qambitində qalib gələn Şəhriyar Məmmədyarov turnirlə vidalaşarkən qapını bərk çırpdı. Azərbaycanlı qrossmeyster bir qədər yaxşı mövqedən maksimum fayda götürməyə və oyunu özü üçün uğurlu şəkildə kəskinləşdirməyə müvəffəq oldu. Ağlar təhlükəli “c” keçid piyadası yaratdı və qaraların əks oyuna başlamaq üçün bütün cəhdlərinin qarşısını dəqiq gedişlərlə aldı. 42-ci gedişdə keçmiş dünya çempionu məğlub olduğunu bildirdi”.

Əlavə edək ki, Azərbaycan şahmatçısının bu müvəffəqiyyəti superturnirin son üç turunda, yəni axırıncı 15 görüşdə qeydə alınmış yeganə qələbədir.

On məşhur qrossmeysterin iştirak etdiyi 10-cu, deməli, həm də yubiley turnirinin yekunlarına gəldikdə, yarışı 4,5 xalla başa vuran Məmmədyarov Kramnik, onun həmvətəni Petr Svidler və çinli Li Çao ilə beş-səkkizinci yerləri bölüşdürmüşdür. Baş mükafatı isə 6 xalla rusiyalı Yan Nepomnyaşi qazanmışdır.

Oqtay BAYRAMOV,
 “Xalq qəzeti”