Topaz Premyer Liqasında birinci dövrə “Qəbələ”nin müdafiədə etibarlı, hücumda məhsuldar oyunu ilə yadda qalacaq. Ötən bazar günü “Qarabağ”a iki cavabsız qolla qalib gələn Qəbələ futbolçuları çempionatda iki həftəlik fasiləni vahid lider kimi qarşılamışlar.

“Neftçi” – “Kəpəz” görüşündə də 2:0 hesabı qeydə alınmışdır. Paytaxt klubu özünün yeni baş məşqçisi Elxan Abdullayevin rəhbərliyi altında ilk qələbəsini qazanmışdır. “İnter” - “Zirə”, “Sumqayıt”-AZAL görüşləri eyni hesabla heç-heçə başa çatmışdır -1:1.

Yeddi oyunda öz qapısından bir top da buraxmayıb, rəqib qapıçıları 19 dəfə məyus edən “Qəbələ” 19 xalla turnir cədvəlinə inamla başçılıq edir. İkinci-üçüncü yerləri tutan “İnter” və Ağdam klubu müvafiq surətdə 15 və 13 xala malikdirlər. “Sumqayıt” birinci dövrənin finişinə 8, “Kəpəz” və “Zirə” 7, “Neftçi” 6, AZAL 2 xalla çatmışlar.

Səkkizinci turun oyunları oktyabrın 15-də keçiriləcəkdir. Həmin gün azarkeşlər “Zirə”-“Neftçi”, AZAL-“Kəpəz”, “İnter”-“Qəbələ” və “Qarabağ”-“Sumqayıt” görüşlərini izləyə biləcəklər.

Oqtay BAYRAMOV,
“Xalq qəzeti