Noyabrın birinci yarısında Serbiyanın Novi- Sad şəhərində kişi və qadın komandaları arasında şahmat üzrə Avropa klublarının kubok yarışı keçiriləcək. Turnirlərin medalları uğrunda 57 kişi və 14 qadın komandası mübarizə aparacaq.

Azərbaycanın “Odlar Yurdu” klubu kişi komandalarının yarışında Rauf Məmmədov, Arkadi Naydiç, Eltac Səfərli, Teymur Rəcəbov, Nicat Abasov, Vasif Durarbəyli, Qədir Hüseynov və Emil Sutovskidən ibarət heyətlə çıxış edəcək. Qadın komandamızın şərəfini  Zeynəb Məmmədyarova, Gülnar Məmmədova, Nərmin Kazımova, Günay Məmmədzadə və Aydan Höccətova qoruyacaqlar. Komandanın kapitanı Fikrət Sideifzadədir.

Şəhriyar Məmmədyarov isə Serbiyanın “Sveti Nikolay Serbski” klubunda oynayacaq. Bu komandada Şəhriyarla yanaşı serbiyalılar Robert Markus, İvan İvanişeviç, Miloş Perunoviç, Branko Damlyanoviç, rusiyalı Aleksandr Morozeviç və macar Riçard Rapport çıxış edəcəklər.

Yeddi turdan ibarət yarış noyabrın 7-də başlanıb, 12-də finişə çatacaq.

Yeri gəlmişkən, hazırda Moskvada Mixail Talın xatirəsinə həsr edilmiş ənənəvi beynəlxaq turnirdə çıxış edən Məmmədyarov dördüncü turda rusiyalı Yevgeni Tomaşevski ilə görüşdə heç-heçə oynayaraq, xal ehtiyatını 2-yə çatdırmışdır. Şahmatçımız bu nəticə ilə turnir cədvəlində orta mövqelərdədir.

Beynəlxalq Şahmat Federasiyasının (FİDE) yenicə dərc etdirdiyi reytinq cədvəlində isə Məmmədyarov oktyabrın 1-nə olan vəziyyətə görə birinci onluğun astanasındadır. Norveçli dünya çempionu Maqnus Karlsenin (2853) başçılıq etdiyi siyahıda Azərbaycan şahmatının lideri 2762 əmsalla 11-cidir.

Dünyanın ən yaxşı 100 şahmatçısının siyahısında digər qrossmeysterlərimizdən Teymur Rəcəbov (2710) 36-cı, Eltac Səfərli (2694) 46-cı, Arkadi Naydiç (2684) 58-ci və Rauf Məmmədov (2678) 63-cü yerləri tuturlar.

FİDE qızlar arasında dünyanın ən yaxşı 100 gənc şahmatçısının da siyahısını açıqlamışdır. Sentyabrda Bakıda keçirilmiş 42-ci Ümumdünya Şahmat Olimpiadasında Azərbaycanın qadınlardan ibarət yığma komandası heyətində uğurla çıxış etmiş Günay Məmmədzadə əvvəlki aylarla müqayisədə öz reytinqini xeyli yaxşılaşdıraraq 2371 əmsalla onuncu pilləyə yüksəlmişdir.

Oqtay BAYRAMOV,
“Xalq qəzeti”