Sentyabrın 14-də, Braziliyanın  Rio-de-Janeyro şəhərində XV Paralimipya Oyunlarının növbəti yarış günü Azərbaycan idmançıları doqquzuncu medalın sevincini yaşamışlar.

Arxası üstə 100 metr məsafəyə üzgüçülük yarışlarında Roman Saley finişə ikinci çataraq (təmsilçimiz yalnız ukraynalı qalib Sergey Klippertdən geri qalmışdır) gümüş mükafat qazanmışdır. Onun qardaşı Dmitri isə həmin məsafədə dördüncü nəticə göstərmişdir.

Paralimpiadanın finişinə üç gün qalmış Azərbaycan komandasının hesabında 9 medal-1 qızıl, 6 gümüş və 2 bürünc mükafat vardır. Yığmamız bu göstərici ilə Rio-2016-da medal qazanmış 78 ölkənin siyahısında 38-ci mövqedədir. İlk üçlüyü isə Çin ( 75 qızıl, 58 gümüş, 39 bürünc medal ), Böyük Britaniya ( 43+24+28 ) və Ukrayna ( 31+23+27 ) təşkil edirlər.

 Oqtay BAYRAMOV,
 "Xalq qəzeti"