Azərbaycan idmançıları Braziliyanın Rio-de-Janeyro şəhərində davam edən XV Paralimpiya Oyunlarında növbəti medallarını qazanmışlar. Bu dəfə təmsilçilərimiz üzgüçülük və atletika yarışlarında fərqlənmişlər.

Dmitri Saley bras üsulu ilə 100 metr məsafəyə üzməkdə finişə ikinci çatmış, Yelena Çebanu isə uzununa tullanmaqda fəxri kürsünün ikinci pilləsinə yüksəlmişdir. Paralimpiyaçılarımızın bu uğurlarından sonra Azərbaycan komandasının medallarının sayı səkkizə çatmışdır.

Xatırladaq ki, cüdoçulardan Ramil Qasımov (73 kq) Oyunların çempionu olmuş, Bayram Mustafayev (66 kq), atletika yarışlarında Y.Çebanu 100 metr məsafəyə qaçışda və uzununa tullanmaqda, Kamil Əliyev də uzununa tullanma startlarında, D. Saley bras üsulu ilə 100 metr məsafəyə üzməkdə gümüş medal qazanmışlar, Rövşən Səfərov (cüdo, 81 kq) və yenə Y. Çebanu (200 metr məsafəyə qaçış) bürünc mükafatçılar olmuşlar.

Sentyabrın 14-də keçirilən yarışlaradək cəmi 78 ölkə idmançıları medal qazanmışlar. Azərbaycan komandası 1 qızıl, 5 gümüş və 2 bürünc mükafatla ümumi hesabda 38-ci yerdədir.

İlk beş pillədə isə Çin (62+51+30), Böyük Britaniya (34+18+22), Ukrayna (27+20+24), ABŞ (20+20+19) və Braziliya (10+21+12) komandaları irəliləyirlər.

Oqtay BAYRAMOV,
"Xalq qəzeti"