Bakıda yüksək səviyyədə təşkil edilən, bütün iştirakçıların və qonaqların ən yaxşı, nümunəvi Olimpiada adlandırdıqları 42-ci Ümumdünya Şahmat Olimpiadası başa çatmış, çempion və mükafatçılar məlum olmuşdur.

Kişilərdən ibarət komandaların turnirində qızıl medalları ABŞ yığması qazanmışdır-20 xal. Ukraynalılar da amerikalılarla eyni nəticə göstərmiş, ancaq əlavə göstəricilərə görə onlardan geri qalmışlar. Üçüncü yeri 18 xalla rusiyalı qrossmeysterlərin komandası tutmuşdur.

İmkanlarından aşağı səviyyədə çıxış edən Azərbaycanın birinci komandası (15 xal) 12-ci yerlə kifayətlənmiş, Azərbaycan 2 şahmatçıları (14) 26-cı, Azərbaycan 3 komandası (13) 49-cu yerləri tutmuşlar.

Qadınların yarışında baş mükafatın sevincini Çin şahmatçıları yaşamışlar. Çempion 20 xal toplamışdır. İkinci-üçüncü yerlərə hərəyə 17 xalla Polşa və Ukrayna sahib olmuşlar.

Azərbaycanın qadınlardan ibarət birinci komandası 16 xal toplayaraq Olimpiadada çıxışlarını ən güclü 10 komanda sırasında-səkkizinci yerdə başa vurmuş, Azərbaycan 3 və Azərbaycan 2 komandaları (13 xal) isə müvafiq surətdə 30-cu və 32-ci olmuşlar.

Növbəti, 43-cü Ümumdünya Şahmat Olimpiadası 2018-ci ildə Gürcüstanın Batumi şəhərində keçiriləcəkdir. 

Oqtay BAYRAMOV,
"Xalq qəzeti"