Braziliyanın Rio-de-Janeyro şəhərində gündən -günə sürətini artıran və getdikcə daha çox növ üzrə turnirləri əhatə edən XXXI Yay Olimpiya Oyunlarının növbəti yarış günündə Olimpiadanın açılış mərasimində Azərbaycan nümayəndə heyətinin bayraqdarı olmuş boksçu Teymur Məmmədov (81 kq) rinqdə qələbələrinin hesabını açmış və fəxri kürsüyə doğru yolda ilk addım atmışdır.

Dörd il əvvəl London Olimpiadasının bürünc mükafatçısı olmuş Məmmədov Rio -2016-da start görüşündə təcrübəli Ukrayna boksçusu Denis Salonenkonu məğlubiyyətlə barışmağa məcbur etmişdir. Şübhəsiz, birinci mərhələdə müvəffəqiyyət Teymurun öz qüvvəsinə inamını daha da artıracaq və o, növbəti görüşlərdə də rəqiblərindən üstün döyüş tərzi nümayiş etdirdiyini sübuta yetirib finaladək irəliləməyə, Braziliyada çıxışlarını İngiltərə paytaxtındakı kimi fəxri kürsüdə başa vurmağa çalışacaq. İkinci dövrədə boksçumuz Hollandiya təmsilçisi Peter Mullenberqi sınağa çəkəcək. Bu görüş avqustun 11-də keçiriləcəkdir.

İdman gimnastikası ustası Oleq Stepko da Oyunlara yaxşı başlamışdır. Təmsilçimiz çoxnövçülükdə altı alətdə təsnifat yarışlarının yekununda 86, 208 xalla finala vəsiqə qazanmışdır. İndi Stepko ən güclü 24 iştirakçı sırasında mübarizəni davam etdirəcək. Final yarışları avqustun 10-da keçiriləcəkdir.

Akademik qayıqlarda avarçəkənlər Aleksandr Aleksandrov – Boris Yotov dueti təsnifat yarışlarında qarşısında duran vəzifəni yerinə yetirmişdir. Bu duet öz qrupunda finişə ikinci çataraq yarımfinala çıxmışdır. Yure Meqliç isə kanoedə slalom üzrə təsnifat yarışlarında yarımfinala vəsiqə qazanmışdır.

Digər idmançımız Olqa Senyuk kamandan oxatan qadınların təsnifat yarışlarında 64 iştirakçı arasında 37-ci nəticə göstərmişdir. Bu gün o, 1/32 finalda Çin idmançısı Hua Çao ilə yarışda mübarizəni davam etdirəcək. 

Cüdoçu Orxan Səfərov (60 kq), təəssüf ki, fəxri kürsünün bir addımlığında məyus olmuşdur. Tatami ustamız Peru, Qırğızıstan və Braziliya nümayəndələri üzərində ardıcıl üç qələbədən sonra yarımfinalda Qazaxıstan idmançısına, bürünc medal uğrunda görüşdə isə yaponiyalı rəqibinə uduzmuş və turniri beşinci yerdə başa vurmuşdur.

Rio-de-Janeyro Olimpiadasının iştirakçıları  306 dəst medal uğrunda mübarizə aparırlar. Avqustun 8-dək 31 ölkə idmançıları fəxri kürsüdə təbrikləri qəbul etmişlər. On yeddi dövlətin nümayəndələri isə qızıl mükafat sevinci yaşamışlar. Dünənki startlaradək medalçı ölkələrin siyahısında liderlər üçlüyünü ABŞ (3 qızıl, 5 gümüş, 4 bürünc mükafat), Çin (3+2+3) və Avstraliya (3 qızıl, 3 bürünc) təşkil edirdi.

Avqustun 8-də Azərbaycanın daha üç idmançısı, cüdoçu Rüstəm Orucov (73 kq), boksçu Abdulqadir Abdullayev (91 kq) və qılıncoynadan Sabina Mikina mübarizəyə qoşulmuşlar.

Olimpiadada baş verən bəzi maraqlı məqamlara da diqqət yetirək. Oyunlar –2016-nın  ilk çempionu ABŞ təmsilçisi Virciniya Treşer olmuşdur. O, qadınların pnevmatik tüfəngdən 10 metr məsafədəki hədəfə atəş açmaq yarışlarında qızıl medal qazanmışdır.

Vyetnam idmançısı Hoanq Suan Vin pnevmatik tapançadan 10 metr məsafədəki hədəfə atəş açmaqda Olimpiadanın çempionu olmuş və Vyetnam tarixində öz ölkəsinə Olimpiya Oyunlarının ilk qızıl medalını qazandırmışdır.

Qadınlardan ibarət futbol komandalarının turnirində braziliyalılar həmvətənlərini ardıcıl ikinci inamlı qələbə ilə sevindirmişlər. Bu dəfə onlar İsveç komandasına heç bir ümid yeri qoymamışlar – 5:1. Start turunda isə Braziliya yığması Çin komandasına üç cavabsız qolla qalib gəlmişdi.

"Mənim  vəzifəm  qızıl medal  qazanmaqdır"

Bu  sözlər  Azərbaycanın  boks  üzrə  yığma  komandasının  üzvü Albert Səlimova  məxsusdur.  Keçmiş  dünya  çempionu,  iki  dəfə  Avropa  çempionatlarının  qalibi, ötən il  Bakıda  təşkil edilmiş birinci  Avropa  Oyunlarının  çempionu  Səlimov  Rio-de-Janeyroda  ondan  müsahibə almış Rusiyanın “R – Sport”  agentliyinin  müxbiri Oleq Boqatovla  söhbətində demişdir ki,  Rioda  qarşıma  maksimum  vəzifə qoyulub – 60 kq  çəki dərəcəsində  qızıl medal qazanmaq. Olimpiadada  qələbə idman  karyeramı  zirvədə  başa çatdırmağa  imkan verər. 

Boksçumuz  daha  sonra demişdir ki,  hazırlıq  səviyyəm  yaxşıdır. Mən  həmişə  yarışlar zamanı özümü  qələbəyə  əsas namizəd kimi hiss  edirəm.  Ona görə ki, imkanlarımı  bilirəm. Düşünürəm ki, Allahın  köməyi ilə hər şey  yaxşı olacaq.  Mən yalnız  birinci yer  haqqında  fikirləşirəm. Rio-de-Janeyroda  qızıl medal qazanacağım  halda karyeramı başa çatdıracağam.

Göründüyü kimi, A.Səlimov Olimpiadada  çıxışlarına  yüksək əhval-ruhiyyə ilə  başlayır  və  öz  qüvvəsinə, ustalıq  səviyyəsinə  inanır.  Yarışlarda  qüvvəyə  inam isə mühüm şərtdir.

Elə Albertin  Azərbaycan milli  komandasındakı dostları da Olimpiada  sınaqlarına səylə  hazırlaşmışlar və onlar da ölkəmizi  medalla  sevindirmək  əzmindədirlər.

Xatırladaq ki, Olimpiya  rinqində  medallar uğrunda həlledici  görüşlər 14-21  avqustda  keçiriləcək.  Hələlik isə bir həftə ərzində ilkin  mərhələlərdə  qaliblər  müəyyənləşəcək.

Oqtay BAYRAMOV,
"Xalq qəzeti"