Azərbaycan çempionu Ağdamın "Qarabağ" ­komandası bu axşam çox məsul bir oyunda meydana çıxacaq. Təmsilçimiz çexiyalı rəqibi "Viktoriya"nın adından çəkinməyib, onu  Bakıdan məğlubiyyətlə yola salsa, UEFA Çempionlar Liqası turnirində üçüncü təsnifat mərəhələsi sınaqlarından da şərəflə çıxaraq Avropa klub futbolunun ən mötəbər  yarışının pley-off görüşlərində oynamaq hüququ qazanacaq. Gözəl prespektivdir!

Tofiq Bəhramov adına Respublika Stadionunun tribunalarında on minlərlə azarkeşin birinci dəqiqədən son saniyələrədək həyəcanla izləyəcəyi   "Qarabağ"-"Viktoriya" görüşündə topa ilk zərbə saat 20:30-da endiriləcək. UEFA bu oyunda ədaləti qorumağı Hüseyn Göçekin başçılığı ilə türkiyəli hakimlər briqadasına   həvalə etmişdir. "Qarabağ"ı tribunalarda da, teleekran qarşısında da var qüvvə ilə, yorulmadan dəstəkləməyə hazırlaşaq.

Hələlik isə bir həftə əvvəl Plzendə keçirilmiş ilk oyundan sonra hesab 0:0-dır. Bakıda cavab görüşündə bizə yalnız qələbə ­lazımdır. Başqa yol yoxdur.

Lakin futbol içtimaiyyətimiz bu günlər təkcə "Qarabağ" həyəcanı ilə yaşamır. Bizim "Qəbələ"miz də var. Avroliqa yarışlarının ilk iki mərhələsində Gürcüstanın 

"Samtredia", Macarıstanın MTK komandaları ilə görüşlərdəki kimi, üçüncü mərhələdə fransızların "Lill" klubu ilə rəqabətdə də qələbəyə can atan "Qəbələ". Səfərdə qollu   heç-heçə (1:1) bu klubumuzun üçüncü təsnifat mərhələsini aşmaq imkanlarını artırmışdır.

Avqustun 4-də "Bakcell Arena"da "Qəbələ"-"Lill"  cavab görüşü saat 21-də başlanacaq. Oyunu rusiyalı hakim Aleksey Yeskov idarə edəcək.

Azərbaycanın "Qarabağ"-"Qəbələ" tandeminin avrokuboklarda çıxışlarını maraqla izləməkdə davam edək.

Oqtay BAYRAMOV,
"Xalq qəzeti"