Maraqlıdır, UEFA Çempionlar Liqası turnirinin üçüncü təsnifat mərhələsinin startında Çexiyanın Plzen şəhərinin "Dusan Arena" stadionunda "Viktoriya" – "Qarabağ" (Ağdam) görüşündə qeydə alınmış qolsuz heç-heçə Bakıda cavab matçından sonra kimin işinə yarayacaq, pley-off mərhələsinə vəsiqənin sevincini kim yaşayacaq?

Bir tərəfdən, meydan sahibləri rolunda çıxış edən çexlər öz qapılarının təhlükəsizliyini axıradək təmin edə bilmişlər və paytaxtımızda cavab görüşündə hər hansı hesabla məhsuldar heç-heçə onlar üçün qələbəyə bərabər olar. Digər tərəfdən də, ölkə çempionumuz səfərdə daha təcrübəli rəqibi ilə bərabər səviyyədə mübarizə aparmışdır. Amma Ağdam klubu Azərbaycan təmsilçisinin futbolumuzun tarixində ilk dəfə Çempionlar Liqasının pley-off mərhələsi iştirakçılarının sırasında görünməsi üçün evdə Çexiya çempionuna hər hansı hesabla qalib gəlməlidir. Deməli, başqa yol yoxdur, bütün ölkə avqustun 2-də Tofiq Bəhramov adına Respublika Stadionunda keçiriləcək "Qarabağ"-"Viktoriya" görüşündə öz sevimli komandasından yalnız və yalnız qələbə gözləyəcək. "Qarabağ" bu arzumuzu da həyata keçirmək əzmindədir. Hələlik isə imkanlar əvvəlkitək bərabərdir.

Liqada üçüncü təsnifat mərhələsinin birinci günü yaxın xaric ölkələri komandalarının iştirakı ilə oynanılmış görüşlərin də nəticələrini xatırladaq: "Rostov" (Rusiya)-"Anderlext" (Belçika)-2:2, "Şaxtyor" (Ukrayna)-"Yanq Boyz" (İsveçrə)-2:0, "Dinamo" (Zaqreb, Xorvatiya)-"Dinamo" (Tbilisi, Gürcüstan)-2:0, BATE (Belarus)-"Dandolk" (İrlandiya)-1:0.

Qeydlərimizi "Qarabağ"ın ümumi müvəffəqiyyətinə böyük ümidlə yekunlaşdırarkən "Qəbələ"nin də Avroliqanın üçüncü təsnifat mərhələsinin ilk oyunu ərəfəsində olduğunu yaddan çıxarmayaq. Bu gün Qəbələ futbolçuları Fransanın Lill şəhərində eyniadlı komanda ilə qarşılaşacaqlar. Görüşü Daniel Stefanskinin başçılığı ilə polşalı hakimlər briqadası idarə edəcək.

Bu rəqiblərin Bakıda  cavab görüşü isə avqustun 4-də keçiriləcəkdir.

Oqtay BAYRAMOV,
"Xalq qəzeti"