Milli Gimnastika Arenasında bədii gimnastika üzrə Dünya kuboku yarışına yekun  vurulmuşdur. Üç gün davam edən turnirin mükafatçıları sırasında Azərbaycan komandasının lideri Marina Durunda da vardır.

Gimnastımız iki hərəkətdə-lent və topla təmrinlərin icrasında final yarışlarına vəsiqə qazanmış, burada lentlə çıxışlarına görə bürünc medala layiq görülmüş, topla hərəkətlərdə isə yeddinci nəticə göstərmişdir.

Azərbaycan paytaxtında bədii gimnastika ustalarının Dünya kuboku yarışını həm də avqustun 5-də başlanacaq Rio-de-Janeyro Olimpiadası ərəfəsində baş məşq hesab etmək olardı. Bakı turniri Braziliyaya səfər ərəfəsində M.Durundaya öz hazırlıq səviyyəsini bir daha yoxlamaq imkanı vermişdir. İndi gimnastımız XXXI Yay Olimpiya Oyunlarında da ölkəmizi layiqincə təmsil etmək üçün qalan vaxt ərzində ustalığını daha da artırmağa çalışacaq.

Rio-2016-da bədii gimnastika yarışları avqustun 19-21-də keçiriləcəkdir.