Azərbaycan idmançıları İsveçin paytaxtı Stokholm şəhərində keçirilən yeniyetmələr arasında sərbəst güləş üzrə Avropa çempionatının birinci günü dörd medal qazanmışlar.

Həmin gün təmsilçilərimiz 42 kq çəki dərəcəsində keçirilən görüşlərdə daha yaxşı hazırlıq nümayiş etdirmişlər. Finalda Mahir Məmmədzadə komanda yoldaşı Maqomedsalix Abakarovu məğlubiyyətə uğradaraq Avropa çempionatının qızıl medalına sahib olmuşdur. Abakarov isə evə gümüş mükafatçı kimi qayıdacaq.

Milli Güləş Federasiyasının saytında bu barədə verilmiş xəbərdə, həmçinin bildirilir ki, daha iki güləşçimiz – İntiqam Vəlizadə (50 kq) və Abubakr Abakarov (69 kq) çıxışlarını fəxri kürsüdə başa vurmuşlar. Onlar bürünc medal qazanmışlar. Vəlizadənin üçüncü yer uğrunda görüşdə ermənistanlı rəqibi Arutyun Manukyana qalib gəldiyini də qeyd edək.

Astana turnirinin
gümüş mükafatçısı

Astanada Qazaxıstan kuboku beynəlxalq turnirində ilk üç yeri tutan şahmatçılar doqquz turda hərəyə 7 xal toplayaraq finişə eyni nəticə ilə çatmışlar.

Əlavə göstəricilərə görə qalib adını Belarus Respublikası təmsilçisi Aleksey Aleksandrov qazanmışdır. Gümüş mükafat Azərbaycan şahmatçısı Vüqar Rəsulova təqdim olunmuşdur. Üçüncü yeri isə özbəkistanlı A.Daurimbetov tutmuşdur.

Rusiyanın e3e5 saytının turnirin yekunları barədə məlumatında yarışda 71 şahmatçının, o cümlədən 10 qrossmeysterin mübarizə apardığı da bildirilmişdir.

Oqtay BAYRAMOV, "Xalq qəzeti"