Azərbaycan çempionu Bakının "Rabitə" klubu qadın voleybol komandaları arasında Çempionlar Liqası turnirində debütünü qələbə ilə qeyd etmişdir. Belə mötəbər yarışda ilk dəfə meydana çıxan voleybolçularımız turnirin qrup mərhələsində start görüşünü səfərdə keçirmələrinə baxmayaraq Buxarestdə yerli "Dinamo"ya qarşı oyunda özlərini evdəki kimi hiss etmiş və 3:0 hesabı ilə inamlı qələbə qazanmışlar.
"İdman Azərbaycan" telekanalı qarşısında ölkəmizin voleybol həvəskarlarının məmnuniyyətlə izlədikləri bu görüşün nəticəsindən göründüyü kimi, meydana Rumıniya paytaxtından evə qalib komanda kimi qayıtmaq əzmi ilə çıxan bakılılar məqsədə elə bir çətinlik çəkmədən nail oldular - 25:18, 25:22, 25:20. Bundan yaxşı başlanğıc ola bilməz!
"Rabitə" ilə "Dinamo"nun çıxış etdikləri "E" qrupunda keçirilən digər oyunda isə ötən illərdə "Azərreyl" ilə görüşlərdən tanıdığımız İtaliyanın "Skavolini" komandası Polşanın "Aluprof" klubunu 3:2 hesabı ilə məğlubiyyətə uğratdı.
Qrupda ikinci turun görüşləri dekabrın 2-də keçiriləcəkdir. Həmin gün "Rabitə" voleybolçuları italiyalı rəqiblərini qəbul edəcəklər, "Dinamo" isə Polşa klubunun qonağı olacaq.