Azərbaycan Gənclər və İdman Nazirliyinin mətbuat xidmətinin yaydığı xəbərə görə, ölkəmizin daha iki idmançısı Rio-de-Janeyro Olimpiadası-2016-ya lisenziya qazanmışdır. Bunlar üzgüçülər Fatimə Alkərəmova və Boris Kirilovdur.

Olimpiada hovuzunda Alkərəmova sərbəst üsulla 100 metr məsafəyə startlarda mübarizə aparacaq, Kirilov isə arxası üstə 200 metr məsafəyə yarışda bacarığını göstərəcək.

Üzgüçülərimizin bu iki lisenziyasından sonra Braziliyaya səfərə çıxacaq Azərbaycan idmançılarının vəsiqələrinin sayı 57-yə çatmışdır. Rio-de-Janeyronun məşhur "Marakana" stadionunda XXXI Yay Olimpiya Oyunlarının (5-21 avqust) açılış mərasiminə isə cəmi 21 gün qalır.

Oqtay BAYRAMOV,
"Xalq qəzeti"