Avropa çempionatının gedişində Portuqaliya komandasının növbəti uğurundan sonra UEFA-nın saytında belə bir xəbər yayılmışdı ki, Portuqaliya futbolçularının baş məşqçisi Fernandu Santuş səfər ərəfəsində yaxınları ilə görüşüb vidalaşarkən Fransaya bir aylığa getdiklərini bildirmişdi. Həqiqətən, finalda oynamaq arzusunda olan məşqçi nə dediyini yaxşı bilirmiş.

Üstəlik də, Portuqaliya komandası iyunun 10-da starta çıxan Avropa çempionatının finişində, yarış üçün ayrılmış bir aylıq müddətin tamamında, 10 iyul axşamında göylərə yüksəlib bütün ölkəyə hədsiz sevinc yaşatdı. Sen-Deni şəhərinin "Stad-de-Frans" stadionunun tamaşaçı ilə ağzına qədər dolu tribunaları qarşısında final görüşündə Fransa millisi üzərində qələbə (1:0) Portuqaliyaya ilk dəfə Avropa çempionu adı qazandırdı. 

Hətta Kriştianu Ronaldunun hələ birinci hissənin birinci yarısında zədələnib meydanı xərəkdə göz yaşları içində tərk etməsi də onun oyundaşalrına zirvəni fəth etməkdə mane ola bilmədi. Əsas vaxtda hesabın açılamadığı finalın qəhrəmanı isə Eder oldu. Oyunun və qızıl medalların taleyini həll edən yeganə qolla bütün Portuqaliyanı 109-cu dəqiqədə məhz bu futbolçu hədsiz sevinclə ayağa qaldırdı.

Beləliklə, 2004-ci ildə öz ölkəsində keçirilmiş qitə çempionatının gümüş mükafatçısı Portuqaliya millisi həmin müvəffəqiyyətdən on iki il sonra çempion olmağı da bacardı.

Avropa çempionatının ən məhsuldar oyunçusu Antuan Qrizmann (6 qol) və onun Fransa yığmasındakı komanda yoldaşları isə gümüş medallarla kifayətləndilər.

Avropa çempionu Vətənə qayıtdıqdan sonra Portuqaliya Prezidenti Marselu Rebelu di Soza ölkə yığma komandasının oyunçularını xidmətlərinə görə ordenlə təltif etmişdir. Mərasim zamanı Prezident demişdir: Siz Avropada ən yaxşılarsınız. Siz mərdlik, qətiyyət və təmkin nümayiş etdirdiniz. Siz bütün millətə nümunə göstərdiniz.

Oqtay BAYRAMOV,
"Xalq qəzeti"