Fransada keçirilən futbol üzrə Avropa çempionatında qızıl medallara cəmi dörd iddiaçı qalır. Portuqaliya və Uels  millilərindən sonra Almaniya və Fransa yığmaları da dörddəbir finalda müvafiq surətdə İtaliya və İslandiya səddini uğurla dəf edərək yarımfinala çıxmışlar.

Finalın astanasında azarkeşlər Portuqaliya--Uels və Almaniya – Fransa görüşlərini izləyəcəklər. Birinci oyun iyulun 6-da Lionda, ikinci matç isə bundan bir gün sonra Marseldə keçiriləcək.

Yarımfinalların qalibləri iyulun 10-da Sen-Deni şəhərinin "Stad-de-Frans" stadionunda çempionluğun taleyinin həll olunacağı final görüşündə qarşılaşacaqlar.

Çempionatda ən çox top vuran futbolçuların siyahısına Antuan Qrizmann başçılıq edir. Fransalı hücümçunun hesabında 4 qol vardır.

Oqtay BAYRAMOV, "Xalq qəzeti"