Fransada keçirilən futbol üzrə Avropa çempionatının səkkizdəbir final mərhələsinin sonuncu oyun günü İslandiya komandasının İngiltərə millisi üzərində əzmkar qələbəsi (2:1) əsl sensasiya oldu. Hələ qrup turnirində növbəti mərhələyə vəsiqə qazanmaqla çoxlarını təəccübləndirən İslandiya futbolçuları səkkizdəbir finalda çempionat başlanmazdan əvvəl qızıl medallara əsas namizədlərdən biri olan İngiltərə yığmasını da məğlubiyyətə uğradaraq hamını bir daha heyrətləndirdilər.

Dörddəbir finalda İslandiyanı daha bir çətin sınaq gözləyir. Avropanın ən güclü səkkiz kollektivi sırasında fəxrlə, böyük qürur hissi ilə yoluna davam edən bu komanda iyulun 3-də fransızlarla görüşəcək.

Dörddəbir final mərhələsinə iyunun 30-da Portuqaliya — Polşa matçı ilə start veriləcək. İyulun 1-də və 2-də isə müvafiq surətdə Uels — Belçika və Almaniya — İtaliya görüşlərində yarımfinalçılar müəyyənləşəcək.

Oqtay BAYRAMOV,
“Xalq qəzeti”