Bir həftə ərzində “Sərhədçi” İdman-Olimpiya Mərkəzində keçirilən boks üzrə dünya Olimpiya təsnifat turniri Azərbaycanın rinq ustaları pərəstişkarlarının arzuladıqları kimi başa çatdı. Yarışda mübarizəyə qoşulan hər üç təmsilçimiz qarşıda duran vəzifəni müvəffəqiyyətlə yerinə yetirdi.

Bakı turnirində Teymur Məmmədov (81 kq), Rüfət Hüseynov (49 kq) və Kamran Şahsuvarlının (75 kq) uğurlarından sonra boksçularımızın Olimpiya vəsiqələrinin sayı 10-a çatmışdır. Bu isə o deməkdir ki, Azərbaycan milli komandası Rio-de-Janeyro rinqində medallar uğrunda tam heyətlə döyüşəcək.

Avqustun 5-dən 21-dək keçiriləcək XXXI Yay Olimpiya Oyunlarının boks yarışlarında ölkəmiz Məmmədov, Hüseynov və Şahsuvarlı ilə yanaşı Albert Səlimov (60 kq), Elvin Məmişzadə (52 kq), Cavid Çələbiyev (56 kq), Lorenso Sotomayor (64 kq), Pərviz Bağırov (69 kq), Abdulqadir Abdullayev (91 kq) və Məhəmmədrəsul Məcidovdan (91 kq-dan yuxarı) ibarət komanda ilə mübarizə aparacaq.

Daha bir boksçumuz Yana Alekseyevna (60 kq) isə qadınların turnirində çıxış edəcək.

Oqtay BAYRAMOV,
“Xalq qəzeti”