Azərbaycanın yunan-Roma güləşçiləri Rumıniyanın paytaxtı Buxarestdə keçirilən gənclər arasında Avropa çempionatında onlara bəslənilən ümidləri doğrultmuşlar.

Xəbər verdiyimiz kimi, yarışın birinci günü iki güləşçimiz fərqlənmişdir. Mikayıl Rəhmanov (60 kq) qızıl, Azər Nəsibli (50 kq) gümüş medal qazanmışlar.

Ertəsi gün isə daha üç güləşçimiz fəxri kürsüyə yüksəlmişdir. Xüsusilə fərəhlidir ki, onlardan ikisi Avropa birinciliyinin qalibi olmuşdur. Nofəl Babayev (55 kq) və İslam Abbasov (84 kq) qızıl mükafatlara sevinmişlər. Sənan Süleymanov (66 kq) bürünc medal qazanmışdır.

Nəticədə yığmamız Avropa çempionatını 5 mükafat-3 qızıl, 1 gümüş və 1  bürünc medalla başa vurmuşdur. Bu uğurlar sayəsində Azərbaycan kollektivi (48 xal) komanda hesabında Gürcüstan (62) və Rusiyadan (50) sonra üçüncü yeri tutmuşdur.

Oqtay BAYRAMOV,
“Xalq qəzeti”