Dünən Almatıda başlanmış sürətli şahmatın blits növü üzrə Qazaxıstan Prezidentinin Avrasiya kuboku turnirinin mükafatları uğrunda 104 rəqib, o cümlədən 62 qrossmeyster mübarizə aparır. İştirakçılar arasında Azərbaycan təmsilçiləri Şəhriyar Məmmədyarov və Rauf Məmmədov da vardır.

Turnirin ən yüksək reytinqli şahmatçısı rusiyalı Yan Nepomnyaşidir (2846). Bu göstərici üzrə birinci beşliyə, həmçinin Le Quanq Lyöm (Vyetnam, 2805), Sergey Karyakin (Rusiya, 2801), Məmmədov (2796) və Boris Gelfand (İsrail, 2792) daxildirlər. Məmmədyarov (2714) siyahıda 15-cidir.

İki gün üçün nəzərdə tutulmuş yarışın qalib və mükafatçıları bu gün məlum olacaq.

Oqtay BAYRAMOV,
"Xalq qəzeti"