Azərbaycan idmançıları dörd il əvvəl Londonda keçirilmiş və ölkəmiz üçün 10 medal-2 qızıl, 2 gümüş, 6 bürünc mükafatla əlamətdar olmuş XXXI Yay Olimpiya Oyunlarına 53 lisenziya qazanmışdılar. Gündən-günə yaxınlaşmaqda olan Rio-de-Janeyro Olimpiadası-2016-da isə yığma komandamız daha böyük heyətlə təmsil olunacaq.

Beynəlxalq Velosipedçilər İttifaqının bu günlərdə Azərbaycan Milli Olimpiya Komitəsinin və Velosiped İd­manı Federasiyasının ünvanına göndərdiyi məktubda yığma ko­mandamızın üzvü Yelena Pav­luxinanın Rio startlarına vəsiqə qazandığı bildirildikdən sonra məlum olmuşdur ki, Azərbaycan idmançılarının Olimpiada sınaq­larına vəsiqələrinin sayı 54-ə çatmışdır.

Yuxarıda xatırlatdığımız məktubda həmçinin qeyd olunmuşdur ki, Pavluxina 2015-2016-cı illərdə beynəlxalq yarış­larda uğurla çıxış edərək 149 lisenizya xalı toplayıb ki, bu da Rioda qrup yarışlarında iştirak edəcək 67 velosipedçi sırasına daxil olmaq üçün yetərli olub.

Beləliklə, avqustun 5-dən 21-dək Braziliya torpağında keçiriləcək XXXI Olimpiadada Azərbaycanı üç velosipedçi təmsil edəcək. Maksim Averin və Yelena Pavluxina şose velosipedinin qrup yarışla­rında, Olqa İsmayılova trek velosipedinin sprint və keyrin növlərində starta çıxacaqlar.

Olimpiadaya lisenziya xarakterli yarışlar isə hələ davam edir və Azərbaycan idmanı nümayəndələrinin Rioya vəsiqələrinin sayının bir qədər də artacağı gözlənilir. Artıq xəbər verdiyimiz kimi, iyu­nun 16-da Bakıda boksçuların sonuncu Olimpiya təsnifat yarışı keçiriləcək və bu turnirdə üç rinq ustamız lisenziya uğrunda mübarizə aparacaq.

Oqtay BAYRAMOV,
“Xalq qəzeti”