Şəmkirdə görkəmli azərbaycanlı qrossmeyster Vüqar Həşimovun xatirəsinə həsr edilən üçüncü beynəlxalq şahmat turniri tədricən finişə yaxınlaşır. Doqquz turdan ibarət yarışın altıncı raundunda rəqiblər “dinc” əhval-ruhiyyədə olmuş və bütün beş görüşdə heç-heçəyə razılaşmışlar. Turnir sahibləri Teymur Rəcəbov Şəhriyar Məmmədyarovla, Rauf Məmmədov rusiyalı Sergey Karyakinlə, Eltac Səfərli ABŞ təmsilçisi Fabiano Karuana ilə, habelə Aniş Giri (Hollandiya) Pavel Elyanovla (Ukrayna) və yarışın yeganə qadın iştirakçısı çinli dünya çempionu Hou İfan hindistanlı Pentala Harikrişna ilə xalı yarı bölmüşlər.

Finişə üç tur qalmış lider Karuananın 5 xalı vardır. İkinci-üçüncü mövqelərdə olan Giri və Karyakin müvafiq surətdə 4,5 və 3,5 xal toplamışlar. Məmmədyarov altı oyunda əllifaizli nəticə göstərmiş – 3 xal, Məmmədov, Rəcəbov və Səfərli 2,5 xal qazanmışlar.

Dünən yeddinci turun oyunları keçirilmişdir. Son iki turun görüşləri isə bu gün və sabah oynanılacaq.

Oqtay BAYRAMOV,
“Xalq qəzeti