Bədii gimnastika üzrə Dünya kuboku yarışlarının final mərhələsi iyulun 22-24-də Azərbaycan paytaxtında keçiriləcəkdir.

Milli Gimnasitika Federasiyasının mətbuat xidmətinin bu barədə yaydığı məlumatda bildirilir ki, yarışın medalları uğrunda 22 ölkənin təmsilçiləri mübarizə aparacaqlar. Əlbəttə, bu mötəbər turnirdə birinci Avropa Oyunlarının gümüş mükafatçısı, Avropa çempionatının bürünc medalının və Rio-de-Janeyro Olimpiadasına lisenziyanın sahibi Marina Durunda başda olmaqla, Azərbaycan idmançıları da çıxış edəcəklər. Milli Gimnastika Arenasında təşkil ediləcək Dünya kuboku turnirinin final mərhələsi onun bir çox iştirakçısı üçün XXXI Yay Olimpiya Oyunları ərəfəsində qüvvələrə ciddi baxışa çevriləcəkdir.

Rumıniyaya, Avropa çempionatına

Azərbaycan şahmat məktəbinin bir qrup yetirməsi Rumıniyaya səfərə çıxmışdır. Bu gün Mamaya şəhərində qadınlar arasında şəxsi Avropa çempionatının açılış mərasimi olacaq.

Çempionatın saytında verilmiş 113 iştirakçının siyahısında təmsilçilərimiz Nərmin Kazımova (2364), Gülnar Məmmədova (2319), Günay Məmmədzadə (2318), Ülviyyə Fətəliyeva (2301), Aydan Höcətova (2300), Türkan Məmmədyarova (2257), Zeynəb Məmmədyarova (2236) və Xəyalə Abdulla (2209) da vardır. İsveçrə sistemi üzrə keçiriləcək turnir 11 turdan ibarətdir. Birinci raundun görüşləri mayın 27-də oynanılacaq. Qalib və mükafatçılar isə iyunun 7-də məlum olacaq.

Oqtay BAYRAMOV,
“Xalq qəzeti”