Şahmat taxtası arxasında dəfələrlə mərhum qrossmeysterimiz Vüqar Həşimovla üz-üzə gəlmiş və onunla yaxından ünsiyyətdə olmuş xarici ölkələrin altı nəfər məşhur zəka sahibi, habelə Vüqarla birlikdə bir çox beynəlxalq yarışda böyük qələbələrin sevinicini yaşamış Azərbaycan milli komandasındakı dostları yenidən Şəmkirin qonağıdırlar. Bu gün görkəmli qrossmeysterin xatirəsinə həsr edilən üçüncü beynəlxalq turnirdə ilk görüşlər keçiriləcək.

Vüqar Həşimovun əziz xatirəsinə dərin hörmət və ehtiramlarını bildirmək üçün Şəmkirə gəlmiş ABŞ təmsilçisi Fabiano Karuana (reytinqi-2804), hollandiyalı Aniş Giri (2790), ötən il Bakıda Dünya kuboku yarışının qalibi olmuş, hazırda isə dünya şahmat tacına iddiaçı rusiyalı Sergey Karyakin (2779), Ukrayna milli komandasının üzvü Pavel Elyanov (2664), hindistanlı Pentala Harikrişna (2769), qadınlar arasında dünya çempionu çinli Hou İfan (2663), eləcə də həmvətənlərimiz Şəhriyar Məmmədyarov (2748), Teymur Rəcəbov (2726), Eltac Səfərli (2664) və Rauf Məmmədov (2655) ilk gedişləri oynamağa hazırdırlar.

Bu on nəfər bir dövrədən ibarət yarışda xatirə turnirinin qalib və mükafatçılarını müəyyənləşdirməlidir. Qrossmeysterlər görüşlərini mayın 26-30-da və iyunun 1-4-də keçirəcək, mayın 31-də isə istirahət edəcəklər. Şəmkirdə unudulmaz Vüqar Həşimovun xatirəsinə həsr edilən beynəlxalq turnirin görüşləri təkcə Azərbaycanda deyil, xarici ölkələrdə də böyük maraqla gözlənilir.

Oqtay BAYRAMOV,
“Xalq qəzeti”