Azərbaycanın qadınlardan ibarət milli voleybol komandası yaxınlaşmaqda olan Avropa Liqası turniri ərəfəsində İsrailə səfərə çıxmışdır. Səfərdən məqsəd qarşıdakı məsul yarışı tam hazırlıqla qarşılamaq üçün son təlim-məşq toplanışında iştirak etmək və bir neçə yoldaşlıq görüşü keçirməkdir.

Toplanışdan sonra komanda Avropliqa turnirinin qrup mərhələsinin birinci dövrəsinin keçiriləcəyi Çernoqoriyaya gedəcək. Orada Azərbaycan voleybolçularının rəqibləri meydan sahibləri ilə yanaşı, Fransa və İspaniya kollektivləri olacaq. Komandamız Çernoqoriyada turnirə iyunun 3-də fransızlara qarşı görüşlə başlayacaq, növbəti iki gündə isə müvafiq surətdə Çernoqoriya və İspaniya yığmalarına qalib gəlməyə çalışacaq.

Turnirin ikinci dövrəsinin oyunları iyunun 10-12-də Fransada təşkil olunacaq.

Oqtay BAYRAMOV,
“Xalq qəzeti”