Qrossmeysterin sevinci

Naxçıvan Şahmat Mərkəzində keçirilmiş Azərbaycan xalqının ümummilli lideri Heydər Əliyevin anadan olmasının 93-cü ildönümünə həsr edilən beynəlxalq turnirdə ən böyük sevinc hissini Eltac Səfərli yaşamışdır. Sonuncu turda Hollandiya təmsilçisi Sergey Tivyakovla heç-heçə oynayan qrossmeysterimiz 9 mümkün xaldan 7 xal toplayaraq yarışın baş mükafatını qazanmışdır.

İkinci yeri Şəhriyar Məmmədyarov tutmuşdur. Azərbaycan şahmatının lideri finişdə İrakli Beradzeyə (Gürcüstan) qalib gəlmiş və Səfərli kimi turniri 7 xalla başa vurmuşdur. Ancaq Şəhriyar əlavə göstəricilərə görə Eltacdan geri qalmışdır. Onu da qeyd edək ki, beşinci turda Məmmədyarov – Səfərli görüşü heç-heçə nəticələnmişdir.

 Turnirin bürünc medalına isə Yuri Kuzubov sahib olmuşdur. Ukrayna şahmatçısı 6,5 xal toplamışdır.

Mükafatçılar üçlüyü – “Qarabağ”, “Zirə”, “Qəbələ”

“Rəvan” – “Xəzər-Lənkəran” – 2:2, “Kəpəz” – “Qəbələ” – 0:1, “İnter” – “Zirə” – 1:0, “Qarabağ” –  AZAL – 3:0, “Sumqayıt” – “Neftçi” – 2:1.

Topaz Premyer  Liqasında 2015 – 2016-cı  illər mövsümünün  sonuncu  turuna  təsadüf  etmiş bu oyunlardan sonra yekun  cədvəlində hər şey öz yerini tutmuşdur. Ardıcıl üçüncü çempionluğu  finişə  hələ dörd tur  qalmış  və çox böyük  üstünlüklə özünə təmin edən “Qarabağ”dan (84 xal), debütant olmasına  baxmayaraq,  bütün dörd dövrə  ərzində əzmkar  və  məhsuldar  oyunu  sayəsində yalnız Ağdam klubundan  geri qalıb finişə ikinci  çatmış gümüş  mükafatçı “Zirə”dən (62) sonra “Qəbələ” (59) bürünc  medala  sahib olmuşdur.

İndi qalır Azərbaycan  kuboku sahibinin kim olacağını gözləmək. Fəxri  mükafatın taleyi mayın 25-də Tofiq Bəhramov stadionunda keçiriləcək “Qarabağ” – “Neftçi” finalında  həll olunacaq.

Avropada ikinci

Azərbaycanın qadınlardan ibarət milli taekvondo  komandasının üzvü, Rio – 2016-ya  lisenziyanın sahibi Patimat Abakarova beynəlxalq  meydanda  yüksək  ustalığını  bir daha  sübuta yetirmişdir.

Dayanq  ustamız  bu dəfə İsveçrənin Montrö şəhərində  keçirilən  Avropa  çempionatında  təbrikləri  qəbul etmişdir. O, Latviya,  Serbiya, Kipr  idmançılarını,  yarımfinalda fransız  Florian Liberionu  məğlubiyyətə  uğratmış və  yalnız  finalda  gərgin  mübarizədən sonra rusiyalı Tatyana Kudaşovaya  uduzub 53 kq  çəki  dərəcəsində  qitə  çempionatının  gümüş  mükafatçısı  ­olmuşdur.

Avropanın ən  güclü  taekvondoçularının  rəqabətində  qazanılmış bu  müvəffəqiyyət Olimpiadaya hazırlıq  prosesində Patimatın öz  qüvvəsinə  inamını, şübhəsiz, bir qədər də  artıracaq.

Kolumbiya Azərbaycan futzalçılarını gözləyir

Kolumbiyanın Medelin  şəhərində  futzal üzrə  dünya  çempionatının püşkü atılmışdır. Tarixində ilk  dəfə mundialın  iştirakçısı  olacaq Azərbaycan millisi ilkin  mərhələdə İran, İspaniya və Mərakeş  yığmaları ilə  birlikdə “F”  qrupunda  çıxış  edəcək.

Çempionatın  medalları  uğrunda altı qrupda 24  komanda  mübarizə  aparacaq. Artıq oyunların  təqvimi də  məlumdur. Azərbaycanın  futzal  ustaları çempionata sentyabrın 12-də mərakeşli  rəqiblərinə  qarşı görüşlə  başlayacaq, sentyabrın 15-də  və 18-də  isə müvafiq  surətdə İspaniya və İran  komandaları ilə oynayacaqlar.

Kolumbiya  stadionlarında dünya çempionatı sentyabrın 10-da  başlayıb,  oktyabrın 1-də  finişə  çatacaq.

Olimpiyaçı triatlonçumuzun reytinqi artır

Bu yaxınlarda Rio-de-Janeyro Olimpiadası – 2016-ya lisenziya qazanmış  Azərbaycanın  triatlon  üzrə yığma  komandasının lideri Rostislav Pevtsov öz  reytinqini  getdikcə  artırır.

Beynəlxalq Triatlon İttifaqının  açıqladığı növbəti reytinq  cədvəlində Pevtsov əvvəlki siyahı  ilə  müqayisədə iki pillə  irəliləyib 14-cü  mövqeyə yüksəlmişdir.

Bir çox  mötəbər yarışda fərqlənmiş, o  cümlədən ötən il Bilgəh çimərliyində “Bakı – 2015” birinci Avropa Oyunlarının bürünc  mükafatçısı  olmuş R.Pevtsov Olimpiya oyunlarında  Azərbaycanı  təmsil edən ilk triatlonçu  olacaq.

Oqtay BAYRAMOV,
“Xalq qəzeti”