Dünya Güləş Birliyi avqustun 5-dən 21-dək Braziliyanın Rio-de-Janeyro şəhərində keçiriləcək XXXI Yay Olimpiya Oyunlarının hər üç təsnifat turnirinə yekun vurmuş və məlum olmuşdur ki, Rusiya, Azərbaycan və Türkiyə güləşçiləri Olimpiadaya daha çox lisenziya qazanmışlar.

Rusiyanın sərbəst güləş, yunan-Roma və qadın güləşi komandaları üst-üstə 18 mümkün vəsiqədən 17-nə sahib olmuşlar, Azərbaycan və Türkiyə kollektivlərinin isə hesabında 14 lisenziya vardır. Ölkəmizin sərbəst güləş ustaları Oyunlara tam heyətlə-6 nəfərlə gedəcək, yunan-Roma güləşçiləri 5 çəki dərəcəsində mübarizə aparacaq, qadın güləşçilərimiz isə Rio xalçası üzərində 3 iştirakçı ilə təmsil olunacaqlar.

Bu arada yunan-Roma və sərbəst güləş üzrə növbəti Dünya kuboku yarışlarının püşkatma mərasimi keçirilmişdir. Hər iki turnirdə qələbə uğrunda səkkiz komanda mübarizə aparacaq. “Klassiklərin” yarışında Azərbaycan millisi İran, Türkiyə və Ukrayna yığmaları ilə birlikdə “B” qrupunda çıxış edəcək. “A” qrupunda Rusiya, Belarus, Almaniya və Qazaxıstan güləşçiləri yarışacaqlar. Turnir mayın 19-20-də İran İslam Respublikasının Şiraz şəhərində keçiriləcəkdir.

Sərbəst güləş yarışlarında isə Azərbaycan güləşçilərinin qrupda rəqibləri İran, Hindistan və ABŞ komandaları olacaq. Digər qrupu Rusiya, Gürcüstan, Türkiyə və Monqolustan kollektivləri təşkil edəcək. Bu turnirdə kubokun sahibi iyunun 11-12-də Los-Ancelesdə (ABŞ) müəyyənləşəcək.

Xatırladaq ki, ötən il Azərbaycanın yunan-Roma güləşi komandası öz tarixində ilk dəfə Dünya kubokuna sahib olmuş, “sərbəstlərdən” ibarət yığmamız isə bürünc mükafat qazanmışdır.

Oqtay BAYRAMOV,
“Xalq qəzeti”