Azərbaycan paytaxtında 17 yaşınadək futbolçulardan ibarət komandalar arasında Avropa çempionatının ilkin mərhələsi finişə yaxınlaşır. Artıq sabah axşam dörddəbir finalda mübarizəni davam etdirəcək ən güclü səkkiz kollektiv məlum olacaq.

Millimizin çıxış etdiyi "A"  qrupunda Portuqaliya iki turdan sonra maksimum nəticə ilə (6 xal) pley-off görüşlərinə vəsiqəni özünə təmin etmişdir. Liderin ən yaxın izləyicisi isə 4 xala malik Belçika yığmasıdır. Portuqaliya ilə start matçında ağır məğlubiyyətdən sonra belçikalılarla görüşdə əzmkar heç-heçəyə (1:1) nail olan Azərbaycan futbolçularının da nəzəri cəhətdən finişə ikinci çatmaq imkanları vardır.

Bunun üçün Təbriz Həsənovun yetirmələri üçüncü turda həm özləri şotlandiyalı rəqiblərinə qalib gəlməli, həm də Portuqaliyanın Belçika üzərində böyük hesabla qələbəsinə ümid etməlidirlər. Hər iki oyun bu gün keçiriləcəkdir.

"B" qrupunda Avstriya (6 xal) vaxtından əvvəl dörddəbir final sevinci yaşamışdır. Hər iki oyunda qələbə qazanan lider ikinci pillədə irəliləyən Almaniyadan 2 xal irəlidədir. Ukraynanın 1 xalı vardır, Bosniya və Herseqovina ardıcıl iki məğlubiyyətdən sonra dörddəbir finalda yoluna davam etmək üçün bütün ümidlərini itirmişdir. Qrupda son görüşlər bu gün oynanılacaq: Ukrayna–Bosniya və Herseqovina, Avstriya-Almaniya.

Digər iki qrupda isə  rəqiblərin turnir vəziyyəti çox mürəkkəbdir və onlardan heç biri hələ dörddəbir final məsələsini həll edə bilməyib.  "C" qrupunda lider Danimarka 4 xal toplamış, İsveç və İngiltərənin hərəyə 3, fransızların 1 xalı vardır. Bu qrupda ilkin mərhələyə sabah Fransa – İsveç və İngiltərə – Danimarka görüşləri ilə yekun vurulacaq.

"D" qrupunda turnir cədvəlinə İspaniya başçılıq edir – 4 xal. Hollandiya və İtaliya komandaları 3, Serbiya futbolçuları 1 xal toplamışlar. Sabah sonuncu turda italyanları ispanlarla, serbləri isə hollandlarla mühüm görüşlər gözləyir.

Oqtay BAYRAMOV,
“Xalq qəzeti”