Azərbaycanın güləş ustaları Türkiyənin İstanbul şəhərində keçirilən dünya Olimpiya təsnifat  turnirinin elə birinci günü Rio-de-Janeyro Olimpiadasına daha bir lisenziya qazanmışlar. Yunan-Roma üsulu ilə güləşən dünya çempionu, Avropa Oyunlarının qalibi Rəsul Çunayev (66 kq) rəqiblərinə heç bir ümid yeri qoymayaraq güləşin bu növündə vəsiqələrimizin sayını beşə çatdırmışdır.

Başlıcası isə, avqustda Braziliyada keçiriləcək XXXI Yay Olimpiya Oyunlarında əsas medal ümidlərimizdən biri olacaq Çunayev İstanbul turnirində yüksək hazırlıq səviyyəsi ilə fərqlənmişdir. Rəsulun xorvatiyalı Dominges Etlinger, belaruslu Pavel Liax, polyak David Karçinski, yarımfinalda Fransa təmsilçisi Artak Marqaryan (Azərbaycan güləşçisi məhz yarımfinaldan sonra ölkəmizə Olimpiya vəsiqəsini təmin etmişdir), finalda isə Ruslan Tsaryov (Qırğızıstan) ilə görüşlərdə parlaq qələbələri onun lisenziyaya və turnirin qalibi adına layiq olduğunu inamla sübuta yetirdi.

Rəsul Çunayevin İstanbul zəfərindən sonra Azərbaycanın güləş komandaları Rio-2016-ya üst-üstə 14 lisenziya qazanmışlar.

Dünən turnirdə qadın güləşçilərimiz Elis Manolova (63 kq) və Gözəl Zutova (75 kq) mübarizəyə qoşulmuşlar.

Oqtay BAYRAMOV,
“Xalq qəzeti”