Bakı stadionlarında keçirilən 17 yaşadək futbolçulardan ibarət komandalar arasında Avropa çempionatının birinci oyun günü qollarla zəngin olmuş, dörd görüşdə qapılara üst-üstə 13 top vurulmuşdur.

"A" qrupunda çıxış edən Azərbaycan futbolçularının portuqaliyalı yaşıdlarına böyük hesabla (0:5) uduzmaları gözlənilməz olmuşdur. Belə ağır məğlubiyyətdən sonra komandamız öz turnir vəziyyətini düzəldib dörddəbir finalda mübarizəni davam etdirmək üçün Belçika və Şotlandiya yığmalarına qarşı növbəti görüşlərdə maksimum nəticə göstərməyə çalışmalıdır. Çətin vəzifə olsa da, hələ hər şey itirilməyib, vəziyyət ümidsiz deyil.

Birinci turda Belçika – Şotlandiya görüşündə belçikalılar 2:0 hesabı ilə qələbə qazanmışlar.

"B"qrupunda Avstriya – Bosniya və Herseqovina matçında da avstriyalıların üstünlüyü iki cavabsız topla ifadə olunmuş (2:0), Ukrayna – Almaniya görüşündə isə rəqiblər hərəyə bir xalla kifayətlənmişlər – 2:2.

Digər iki qrupda start turunun oyunları dünən keçirilmişdir. Birinci olaraq İtaliya – Serbiya ("D" qrupu) görüşü başa çatmışdır. Sonra bu qrupda Hollandiya-İspaniya matçı oynanılmışdır.

Tura "C" qrupuna daxil olan komandaların İngiltərə – İsveç və Fransa – Danimarka görüşləri ilə yekun vurulmuşdur.

Oqtay BAYRAMOV,
"Xalq qəzeti"