Dünən Bakıda 17 yaşınadək futbolçulardan ibarət yığma komandalar arasında Avropa çempionatında ilk oyunlar keçirilmişdir. Turnir “Baksell Arena”da Avstriya—Bosniya və Herseqovina (“B” qrupu) görüşü ilə başlanmışdır. Bu oyunda avstriyalıların xeyrinə 2:0 hesabı qeydə alınmışdır.

Çempionatın medalları uğrunda 16 komanda mübarizə aparır. Rəqiblər ilkin mərhələdə hərəsində dörd kollektiv olmaqla dörd qrupa bölünmüşlər.

Azərbaycan millisi Şotlandiya, Portuqaliya və Belçika komandaları ilə birlikdə “A” qrupuna daxildir. Təbriz Həsənovun yetirmələri dünən Bakı Olimpiya Stadionunda saat 20-də başlanan görüşdə portuqaliyalı yaşıdları ilə qarşılaşmışlar. Oyun 5:0 hesabı ilə qonaqların xeyrinə başa çatmışdır.

Yığmamız növbəti oyunları isə mayın 8-də və 11-də müvafiq surətdə Belçika və Şotlandiya futbolçuları ilə keçirəcək.

Çempionatın start günü, həmçinin Ukrayna – Almaniya (“B” qrupu) və Belçika – Şotlandiya matçları oynanılmışdır.

Digər iki qrupda ilk oyunlar bu günə təyin edilmişdir: “C” qrupunda Fransa – Danimarka, İngiltərə – İsveç, “D” qrupunda isə İtaliya – Serbiya və Hollandiya – İspaniya görüşləri keçiriləcəkdir.

Qrup turnirlərinə mayın 12-də yekun vurulacaq. Hər qrupdan ən yaxşı iki komanda dörddəbir finala çıxacaq. Bu mərhələnin görüşləri mayın 14-15-də keçiriləcək. Dörddəbir finalların qalibləri mayın 18-də yarımfinallarda oynayacaqlar. Finalın astanasında qələbə qazanan komandalar mayın 21-də Avropa çempionatının ən mühüm  görüşündə, finalda qızıl medallar uğrunda mübarizə aparacaqlar.

Oqtay BAYRAMOV,
“Xalq qəzeti”