Bu gün İstanbulda güləş üzrə dünya Olimpiya təsnifat turnirinə start veriləcəkdir. Rio-de-Janeyro Olimpiadası—2016-ya  vəsiqə verən yarışda Azərbaycan dörd iştirakçı ilə təmsil olunacaq.

Yunan-Roma güləşi ustalarının turnirində Rəsul Çunayev (66 kq) və Şalva Qadabadze (98 kq), qadın güləşində isə Elis Manolova (63 kq) və Gözəl Zutova (75 kq) ölkəmizə Olimpiya “biletləri” qazandırmağa çalışacaqlar.

Birinci olaraq mübarizəyə bu gün “klassiklər” başlayacaqlar. Sabah isə qadınlar lisenziyaların sahiblərini müəyyənləşdirəcəklər. Avqustda keçiriləcək XXXI Olimpiya Oyunlarının medalları uğrunda mübarizə aparmaq hüququnu turnirin finalçıları qazanacaqlar.

İstanbul sınaqları güləş ustaları üçün Braziliyaya aparan yolda son addımdır. Hələlik Azərbaycan güləşçilərinin hesabında 13 lisenziya vardır. “Sərbəstlər” Olimpiadaya tam heyətlə (altı nəfər) getmək vəzifəsini müvəffəqiyyətlə yerinə yetirmişlər. Yunan-Roma güləşçiləri dörd, qadınlar isə üç çəki dərəcəsində yığmamıza vəsiqələri təmin etmişlər.

Oqtay BAYRAMOV,
“Xalq qəzeti”