Bu gün AZAL–"Xəzər-Lənkəran" və “Kəpəz”–"Rəvan" görüşləri ilə Topaz Premyer Liqasında 32-ci tura start veriləcəkdir. Turun qalan görüşləri isə sabah keçiriləcəkdir: “İnter”–"Sumqayıt", “Zirə”–"Qarabağ", “Qəbələ”–"Neftçi".

Xüsusi maraqla gözlənilən bu tur çempionluq mübarizəsində həlledici ola bilər. Əgər 72 xalla turnir cədvəlinin zirvəsində hətta ən yaxın izləyicisi “Zirə” (60 xal) üçün əlçatmaz görünən Ağdam klubu debütantla oyundan qalib ayrılsa, vaxtından əvvəl, finişə hələ dörd tur qalmış ardıcıl üçüncü dəfə çempionluğu bayram edəcək. “Zirə” isə müvəffəqiyyət qazanacağı təqdirdə gümüş medallara bir addım da yaxınlaşacaq.

Elə hərəyə 49 xalla cədvəlin üç-beşinci pillələrində irəliləyən “İnter”, “Kəpəz” və “Qəbələ”nin iştirakı ilə keçiriləcək görüşlər də az əhəmiyyət kəsb etmir. Görünür, bu komandaların finişə mükafatçılar sırasında çatmaq üçün kəskin rəqabətin son anadək onların pərəstişkarlarını həyəcanlı vəziyyətdə saxlayacaq. Bir sözlə, qarşıdakı tur azarkeşlərə maraqlı hadisələr  vəd edir.

Bu  turdan sonra nəzərlər yenidən ölkə kuboku görüşlərinə yönələcək. Yarımfinal mərhələsinin ilk oyunlarında “İnter Arena”da “İnter”i dörd cavabsız qolla məğlubiyyətə uğradan “Qarabağ”, demək olar, artıq finaldadırsa, “Bakcell Arena”da bir-birinin müqavimətini qıra bilməyən (1:1) “Neftçi” ilə “Qəbələ”nin Qəbələdə cavab görüşündə əvvəldən axıradək daha gərgin mübarizənin şahidi ola bilərik. Hər iki oyun mayın 4-də keçiriləcək.

Oqtay BAYRAMOV,
“Xalq qəzeti”