Braziliyanın Rio-de-Janeyro şəhərində keçiriləcək XXXI Yay Olimpiya  Oyunlarının (5-21 avqust) güləş yarışlarına hələlik ən çox lisenziyanı bu üç ölkənin komandaları qazanmışlar. Hazırda Rusiya yığmasının hesabında 15 vəsiqə vardır, Azərbaycan və Qazaxıstan isə 12 lisenziyanı özlərinə təmin etmişlər. Dünya Güləş Birliyinin bu göstəricilər barədə açıqladığı siyahıda liderlər üçlüyünün ən yaxın qonşuları hərəyə 10 lisenziya qazanmış Kuba, İran və Yaponiyadır.

Olimpiada-2016-ya lisenziya xarakterli növbəti yarışa bu gün Ulan-Batorda start veriləcək. Azərbaycanın güləş ustaları Monqolustan paytaxtında Olimpiya “biletlərinin” sayını dörd nəfərlə artırmağa çalışacaqlar. “Klassiklərin” turnirində ölkəmizi Həsən Əliyev (66 kq), Orxan Nuriyev (98 kq), “sərbəstlərin” görüşlərində Mircəlal Həsənzadə (57 kq), qadınların yarışında isə Gözəl Zutova (69 kq) təmsil edirlər.

Dünya təsnifat turniri yunan-Roma üsulu ilə güləşənlərin görüşləri ilə başlanacaq, növbəti iki gündə qadınlar və sərbəst güləşənlər lisenziyaların sahiblərini müəyyənləşdirəcəklər.

Sərbəst güləşdə və yunan-Roma güləşində öz çəki dərəcələrində ilk üç yeri tutanlar, qadın güləşində isə finalçılar Olimpiadaya vəsiqə qazanacaqlar.

Oqtay BAYRAMOV,
“Xalq qəzeti”