UEFA Çempionlar Liqası turnirinin yarımfinalında mübarizəni davam etdirəcək daha iki komanda məlum olmuşdur. İspaniyanın “Real” (Madrid)  və  İngiltərənin “Mançester Siti”  klublarından sonra İspaniyanın daha bir təmsilçisi “Atletiko” və “Bavariya” (Almaniya) da xoşbəxt günlərini yaşayırlar.

“Atletiko” dörddəbir finalda iki oyunun yekununda “Barselona”dan güclü olmuş (səfərdə 1:2-dən sonra evdə 2:0), “Bavariya”  isə “Benfika”nı (Portuqaliya)  məyus etmişdir — 1:0 və 2:2.

Nəticədə Avropa klub futbolunun ən ali  mükafatı Çempionlar  Liqası  kubokuna cəmi dörd iddiaçı qalır — “Real”, “Atletiko”, “Mançester Siti” və “Bavariya”. Yarımfinalda “Mançester Siti”  “Real” ilə görüşəcək, “Atletiko” isə “Bavariya”ya qalib gəlməyə çalışacaq. Yarımfinal oyunları aprelin 26-27-də və mayın 3-4-də  keçiriləcəkdir. Qaliblər mayın 28-də Milanda (İtaliya)  final matçında qarşılaşacaqlar.

Oqtay BAYRAMOV,
“Xalq qəzeti”