Azərbaycanlı qrossmeyster Şəhriyar Məmmədyarov Moskvada səkkizinci dünya çempionu Mixail Talın xatirəsinə həsr edilmiş XXI kateqoriyalı beynəlxalq turnirdə özünün ikinci qələbəsini qazanmış və finişə üç tur qalmış bu mötəbər yarışın iki liderindən biri olmuşdur.
Təmsilçimizin altıncı tura təsadüf etmiş ikinci qələbəyə ukraynalı Pavel Elyanov ilə görüşdə nail olduğu barədə artıq xəbər vermişik. Xatırladaq ki, Elyanov bu yaxınlarda Xantı-Mansiyskdə (Rusiya) keçirilmiş 39-cu Ümumdünya Şahmat Olimpiadasında öz ölkəsinin yığma komandası heyətində çempion olmuşdu. Moskvada isə o, Məmmədyarovla görüşün 49-cu gedişində çətin vəziyyətdən çıxış yolu tapa bilməyərək məğlubiyyətlə barışmağa məcbur olmuşdur.
Turun qalan dörd görüşündə Aleksey Şirov (İspaniya) Levon Aronyanla (Ermənistan), Sergey Karyakin (Rusiya) həmvətəni Aleksandr Qrişukla, Hikaru Nakamura (ABŞ) Van Hao (Çin) ilə, Boris Gelfand (İsrail) Vladimir Kramniklə heç-heçə oynamışlar.
Dünən keçirilən yeddinci tur ərəfəsində turnir cədvəlinin ilk iki pilləsində olan Məmmədyarovla Aronyan hərəyə 4 xal toplamışdılar. Üçüncü-altıncı yerləri bölüşən Karyakin, Qrişuk, Nakamura və Van Hao liderlərdən yarım xal geri qalırdılar.
Dünənki turda Azərbaycan şahmatçısı qara fiqurlarla rusiyalı Vladimir Kramnikə qarşı oynamışdır. Şəhriyarın rəqibi bu görüşə 3 xalla yeddinci yerdə gəlmişdi.

Oqtay BAYRAMOV, "Xalq qəzeti"